Një ditë pas tragjedisë në kampin e refugjatëve në ishullin e Lesbos, ku një nënë dhe një fëmijë humbën jetën si pasojë e një zjarri të qëllimshëm, qeveria greke vendosi përshpejtimin e procedurave të azilit.
Zjarri shpërtheu pasditen e të dielës, dhe përfshiu zonën 4 të kampit Moria, ku ishin strehuar kryesisht refugjatë afrikanë. Shumë shpejt situata mori karakterin e një revolte. Refugjatët tentuan të pengonin makinat e zjarrfikësve, duke nxjerrë jashtë përdorimit dy prej tyre. Pas mesnate situata u vu nën kontrollin e autoriteteve dhe vazhdon të mbetet e qetë.
Me një kapacitet prej 3 mijë personash, aty janë strehuar 12 mijë refugjatë që presin prej një kohë shumë të gjatë përgjigje për aplikimet e tyre për azil.
