Aristotelia Peloni Zëdhënsja e qeverisë së Greqisë ka dhënë një deklaratë zyrtare sa i përket hapjes së vendit fqinj për turistët. Ajo konfirmoi se sezoni turistik në Greqi do të rihapet për vizitorë nga 30 vende të ndryshme përfshirë Serbinë ama jo për vendin tonë. Turistë nga mbi 30 vende nuk do të hyjnë në karantinë nëse janë të vaksinuar kundër koronavirusit ose rezultojnë negativ pasi të kenë bërë tamponin.
Vendimi hyn në fuqi nga e hëna e ardhshme ndërkohë ajo thekson: Kjo është një hapje pilot.
Projekti ka të bëjë me vizitorë nga shtetet europiane apo nga vendet e tjera që kanë certifikatë vaksinimi ose teste shqyrtimi PCR. Përveç karantinës shtatëditore, udhëtarët që mbërrijnë aktualisht në Greqi duhet të paraqesin një test negativ për COVID-19, jo më të vjetër se 72 orë. Vetëm turistët izraelitë, të cilët janë vaksinuar, nuk u nënshtrohen këtyre detyrimeve, si rezultat i një marrëveshje dypalëshe.
