Bashkë me dyqanet e tjera të pakicës, sot nisi punë edhe Tregu Çam në kryeqytet. Por pavarësisht se tregtarët kishin ngritur qepenat dhe kishin reklamuar mallin, në treg mungonin blerësit. Ata ankohen se malli i dimrit u ka mbetur stok, ndërsa kanë vështirësi me furnizimin për shkak të mbylljes së kufijve. Pas më shumë se 7 javësh bllokim me vendim të qeverisë, është hapur dhe grupi i dytë i aktiviteteve tregtare dhe bizneseve të tjera në të gjithë vendin.Këtë të hënë edhe dyqanet në Tregun Çam kanë hapur qepenat por blerësit dhe kërkesat mungojnë.
Pezullimi i aktivitetit ka bërë që malli i dimrit të ngelet stok dhe mbyllja e kufijve ua vështirëson marrjen e furnizimit të ri.
“Po na mbeten stok, janë lekë të humbura.”Tregtarët shprehen se klientela mungon, ndërkohë që të ardhmen e shohin me pesimizëm. “Gjendja duket e vështirë, nuk pyet njeri fare. Nuk ka pasur fuqi blerëse për momentin. Shpresojmë.”
“I kemi hapur por askush nuk po kalon. Na ka kapur paniku, pas kësaj që ndodhi mendoj se do të jetë shumë e vështirë.”
“Nuk ka lëvizje fare, shumë e bllokuar.”“Shitje nuk ka, të paktën po sistemojmë dyqanet.”
Rrugën e tregut qytetarët e përdorin më shumë si një mundësi kalimi se sa blerje. Jashtë kamerave ata shprehen se kanë hasur vështirësi edhe në nxjerrjen e lejes në e-Albania për hapjen e aktivitetit për shkak të mbingarkesës.Disa e kanë përfituar pagën e luftës por ka dhe nga ata që nuk kanë marrë asnjë lekë si mbështetje për periudhën që qendruan mbyllur.
“Kemi aplikuar por nuk kemi marrë pagë dhe asgjë.” Bizneset që janë klasifikuar në listën e dytë të qeverisë për të nisur punë pas bllokimit në kuadër të masave për frenimin e përhapjes së Covid-19 duhet të marrin vërtetimin për hapje aktiviteti në e-Albania dhe të respektojnë protokollin e sigurisë.oranews
