Mijëra emigrantë janë bllokuar në kufirin midis Greqisë dhe Turqisë pasi kjo e fundit vendosi të hapë kufinjtë e saj.
Emigrantët nga Siria dhe Afganistani janë të kërcënuar nga lufta në vendet e tyre dhe shohin Bashkimin Europian si shpresën e tyre të vetme për të ndërtuar një jetë të re.
Tashmë ata gjenden në kufirin me Greqinë të ekspozuar ndaj të ftohtit dhe erës. Ata nuk kanë para dhe as shumë ushqim. Ndërsa fëmijët e tyre qajnë, ata ulen dhe presin një mundësi për të kaluar vendet e BE-së, shkruan The Independent.
Deklarata e presidentit turk Rexhep Tajip Erdogan javën e kaluar se Ankaraja po hap kufijtë për emigrantët në Evropë, u pasua me një dyndje të madhe të tyre drejt Greqisë.
Por megjithëse Turqia i hapi kufinjtë e saj, dyert e Bashkimit Evropian janë të mbyllura dhe refugjatët nga vendet e shkatërruara nga lufta si Siria dhe Afganistani e më larg nga Somalia dhe rajoni i Kashmirit tani gjenden të mbërthyer në pritje për të lëvizur drejt BE.
