/ATSH/ Kryeministri në detyrë, Ramush Haradinaj ka theksuar se Parku Inovativ Trajnues Kosovaro – Gjerman në Prizren, është hapur nga dita e sotme vetëm për ata që janë prekur nga tërmeti, që kanë humbur shtëpitë e tyre dhe nuk kanë se ku të strehohen.
“Parku Inovativ Trajnues Kosovaro – Gjerman, që ka një dedikim tjetër të funksionimit, dyert e tij sot i ka hapur për bashkëkombësit tanë, vëllezërit dhe motrat tona, të cilët u përballen me këtë fatkeqësi”, ka theksuar Haradinaj. Kryeministri në detyrë së bashku me kryetarin Mytaher Haskuka dhe ambasadorin gjerman në Prishtinë, Christian Heldt, u mblodhën në Prizren për një mobilizim ndërinstitucional për t’u ardhur në ndihmë të prekurve nga tërmeti në Shqipëri. Po sot, është ngritur një grup koordinues në nivel qendror të Qeverisë, të Ministrisë së Brendshme dhe të agjencive përkatëse të specializuara për temat e të zhvendosurve, pranimin dhe integrimin e tyre.
Haradinaj u shpreh se me të gjithë aktorët ndërinstitucionalë “do të vazhdojmë punën që këtë situatë emergjente ta menaxhojmë në mënyrë të përgjegjshme dhe t’u ofrojmë ndihmë të prekurve nga tërmeti me pasoja tragjike që goditi Shqipërinë”./KosovaPress/
