Presidenti i Kosovës Hashim Thaçi i është nënshtruar një operacioni pasditen e sotme. Pak ditë më parë u njoftua se ai u shtrua në spital për shkak të një problemi shëndetësor me veshkat.

Zyra e Presidentit të Kosovës bën me dije se operacioni ka qenë i suksesshëm dhe se Thaçi është nën kujdes të vazhdueshëm të personelit mjekësor. “Presidenti i Republikës së Kosovës, Hashim Thaçi, sot pasdite i është nënshtruar një intervenimi kirurgjik endourologjik në Klinikën e Urologjisë në Shërbimin Spitalor Kliniko-Universitar të Kosovës.

Sipas personelit mjekësor, operacioni ka qenë i suksesshëm dhe presidenti është nën kujdesin e vazhdueshëm të personelit mjekësor profesional. Pas përfundimit të këtij intervenimi, presidenti Thaçi është shprehur mirënjohës për profesionalizmin dhe kujdesin e stafit profesional në Klinikën e Urologjisë dhe në tërë SHSKUK-në”, thuhet në njoftim.