Fëmijët që shihni në foto janë fëmijët e dy familjeve në Pulahë të Korçës që rriten pa drita pas ndërtimit të HEC-it Moglicë.
“Me fëmijët e mrekullueshëm të fshatit Pulahë të përmbytur nga liqeni, dhe që jetonin pa drita në këtë shtëpi jashtë çdo kushti jetese, sa dashuri e mirësi na falën!”
Ky mesazh i postuar nga Zhuljeta Grabocka Çina, një ish-mësuese e nderuar në përkushtimin e saj profesional vjen si apel për dy familje të haruara që mbijetojnë me shumë vështirësi në fshatin Pulahë, raporton Korça Report.
Pas një vizite në këtë fshat, ish-mësuesja është befasuar dhe habitur nga kushtet ku jetojnë dy familjet.
“Ndërtimi i Hidrocentralit të Moglicës i la pa shtëpi dy familjet. Me sa duket, ngaqë ishin të zhvendosura njëra në Durrës dhe tjetra në Çiflig të Korçës, nuk arritën të lidhin kontratë me firmën norvegjeze që zbatoi projektin e ndërtimit të HEC-it dhe që kishte si detyrim sigurimin e një banese të re për ato familje që ju përmbytën shtëpitë nga liqeni i hidrocentralit të Moglicës”, ka mësuar për fatin e dy familjeve Zhuljeta Grabocka Çina.
Dy familjet në Pulahë merren njëra me rritjen e bletëve dhe tjetra të bagëtive për të siguruar jetesën. Fëmijët nuk mund të shohin TV, nuk kanë frigorifer e mjete të tjera të nevojshme, dhe qëndrojnë në një vend me bagëtitë.
Familjet e tyre janë jashtë çdo vëmendje të politikave sociale, edhe pse kanë bërë të njohur gjendjen e tyre në një emision televiziv investigativ.
