Një shqiptar u arrestua të shtunën nga policia italiane, ndërsa për të ishte lëshuar një urdhër arresti nga Belgjika. Arrestimi i shqiptarit, i cili kishte arritur ti zhdukej autoriteteve belge, u arrit pasi policia italiane i kishte zbuluar një lidhje me një vajzë që jetonte në afërsi të Sienas. Policia vendosi të verë nën survejim vajzën, që ishte e dashura e shqiptarit, me shpresën se ata do të takoheshin.
Dhe skema e ngritur funksionoi, pasi shqiptari u vu në pranga në momentin që shkoi të takojë të dashurën e tij.Emri i të arrestuarit nuk bëhet i ditur, por raportohet se ai është 29 vjeç dhe akuzohet se drejtonte një rrjet trafiku të qenieve njerëzore.
Sipas gazetave belge, ai drejtonte një rrjet trafikantësh shqiptarë, që dërgonin njerëz nga Afrika dhe Azia drejt Europës, në veçanti drejt Britanisë së madhe. Belgjika kishte lëshuar një urdhër-arresti, por shqiptari ishte zhdukur. Shqiptari rrezikon 20 vite burg në Belgjikë.
