Në puntatën e ditës së sotme, në “Identitet”, gazetarja dhe moderatorja Aida Shtino ka prezantuar për teleshikuesit e FaxNews, një pjesë të veçantë të qytetit të Gjirokastrës.
Së bashku me të gjitha bukuritë që kjo zonë dhe kryesisht qyteti i Gjirokastrës ka për të ofruar, janë dhe gjirokastritët me kulturën e tyre që e pasurojnë edhe më shumë këtë bosht të rëndësishëm qytetarie.
Ky stil i veçantë, për të cilin Gjirokastra shquhet, ku orientalja shkrihet më së miri me perëndimoren, krijojnë peisazhe mahnitëse.
Moderatorja Aida Shtino, është takuar me aktoren e njohur të qytetit të Gjirokastrës, Liljana Kumbaro Ristani, e cila mban në trupin e saj veshjen tradicionale gjirokastrite, që është paraqitur në foton e mëposhtme.
Veshja e përdorur, është e larmishme në detaje dhe tepër elegante, duke pasqyruar kështu një shije të rafinuar, ku zakonisht tregon dhe një nivel të lartë jo vetëm ekonomik.
Gazetarja, sigurisht që nuk mund të linte pa takuar këngëtarin e polifonisë Roland Çenkon, i cili njihet për faktin që është i aftë të këndojë 4 zëra në një këngë.
“Logatja” është një përzierje e veçantë mes vajit dhe këngës në Labëri. Çenko e interpreton shkëlqyeshëm, këtë gjini të magjishme. Si një njeri i vetëm, ai kryen disa role duke zëvendësuar kështu deri në pesë këngëtarë. Si një bekim, jo vetëm për të, por edhe për Shqipërinë, Roland Çenko është një nga mjeshtërit e rrallë që mund ta realizojë këtë proces.
“Identitet”, portretizoi Gjirokastrën edhe një herë, ashtu të gurtë, por të mbushur me ngjyra. Një qytet stoik, historia dhe kultura e të cilit rrëmbejnë adhurimin kujtdo që e viziton.
