Zv.drejtori i Institutit të Shëndetit Publik, Dritan Ulqinaku në një dalje për mediat flet për helmimin masiv të banorëve të Krujës nga uji i pijshëm. Ulqinaku shprehet se në analizat e ujit të pijshëm në Krujë, të bëra nga ISHP janë zbuluar prani të bakterit enterokok, që tregon se uji i pijshëm është përzierë me atë të reshjeve të shiut.
Për këtë fakt, zv.drejtori i ISHP bën përgjegjës Ujësjellësin. “Nga analizat e marra nga Instituti i Shëndetit Publik ka rezultuar që në një pikë vetëm të ujësjellësit të Krujës ka rezultuar bakteri enterokok i cili mendohet që mund të jetë shkaktari i këtyre shqetësimeve gastrointersinale që qyetarët e Krujës kanë pasur”, ka bërë me dije Ulqinaku.
Në fjalën e tij Ulqinaku tha se mendohet që kjo epidemi hidrike është shkaktuar si rezultat i ndotjes sipërfaqësore të shirave të rëna para pak ditësh që kanë sjellë përzierje me ujërat e pijshëm të ujësjellësit të Krujës. Duke i’u përgjigjur pyetjes së gazetarëve Ulqinaku tha se situata do të vijojë të monitorohet për të paktën një muaj deri sa të jenë të sigurtë që çdo gjë të jetë në rregull.
