“Unë nuk vras, nuk vjedh, nuk shantazhoj, nuk shpif, nuk fle para tjerëve, nuk zgjohem pas të tjerëve, nuk zdërhallem për qejfet e mia lokaleve të Tiranës apo rrugëve të botës. Unë nuk punoj për të jetuar, por jetoj për të punuar”. Kështu deklaroi pak ditë më parë kryeministri i vendit, Edi Rama, në një fjalim ‘mallëngjyes’, ku tentoi dëshpërimisht t’iu hedhë hi syve shqiptarëve, duke iu shfaqur si të ishte vërtetë “Baba i Kombit”, ashtu siç preferon ta quajë veten.
Por siç thotë një shprehje e urtë popullore “bëj siç them unë, por mos bëj si bëj unë”, kjo është edhe motoja e Ramës, i cili pa kaluar asnjë javë nga kjo deklaratë, udhëtoi me charter privat drejt Parisit, në një kohë kur daljet jo vetëm jashtë vendit, por edhe ato ndërqytetase, janë ende të ndaluara për shqiptarët. Ky udhëtim luksi i Ramës, i cili gënjeu publikisht në deklaratën e tij mallëngjyese, erdhi në një kohë kur shqiptarët po përballen me krizën e thellë ekonomike si pasojë e pandemisë.
Por, Rama as që do t’ia dijë për popullin e tij mesa duket, pasi ai e ka luksin të udhëtojë për qejfin e tij në kryeqytetin francez. Një gjë e tillë u denoncua nga opozita, përmes sekretarit të Përgjithshëm të Partisë Demokratike, Gazment Bardhi, i cili e cilësoi të turpshëm udhëtimin e Ramës.
