Ministrja e Shëndetësisë Ogerta Manastirliu ka prezantuar këtë të enjte planin e qeverisë për lehtësimin masave shtrënguese që pritet të hyjnë në fuqi të hënën e ardhshme. Manastirliu u shpreh se nga data 4 maj, një sërë bashkish të reja do të futen në atë që është përcaktuar si ‘zonë e gjelbër’, ku qytetarët kanë më shumë liri lëvizjeje. Më konkretisht, bashkitë janë: Tropojë, Rrogozinë, Peqin, Belsh, Cërrik, Gramsh, Ura Vajgurore, Kucovë, Berat, Poliçan, Skrapar, Devoll, Pustec, Maliq, Mallakastër, Kolonjë Vlorë, Selenicë.
“Jemi në një moment shumë të rëndësishëm dhe përcaktues për vijimin e situatës epidemike në vend. Nga vlerësimi i vazhdueshëm i të dhënave epidemiologjike, konstatohen ende vatra aktive infeksioni, në disa zona të vendit, ku po punohet intensivisht nëpërmjet testimit dhe gjurmimit agresiv të kontakteve. Strategjia e ri-ihapjes e hartuar nga Komiteti Teknik i Ekspertëve, parashikon disa faza të lehtësimit të ngadaltë dhe të kujdesshëm të masave shtrënguese. Nga data 4 Maj do të përfshihen si zona të gjelbërta bashkitë: Tropojë, Rrogozinë, Peqin, Belsh, Cërrik, Gramsh, Ura Vajgurore, Kucovë, Berat, Poliçan, Skrapar, Devoll, Pustec, Maliq, Mallakastër, Kolonjë Vlorë, Selenicë”, bëri të ditur Manastirliu.
Më tutje Manastirliu theksoi tha se nga e hëna e ardhshme do të lejohen të qarkullojnë edhe taksitë që do të kryejnë udhëtime ndërqytetase, me kushtin që do të mund të transportojnë jo më shumë se dy qytetarë, të cilët duhet të jenë familjarë mes tyre. Në lidhje me personat që vijnë nga shtetet e huaja apo zona të kuqe, Manastirliu tha se ata do të vetëkarantinohen në shtëpitë e tyre, por ndryshe do të veprohet me ata qytetarë që riatdhesohen dhe jetojnë në zonat e shpallura të gjelbra në Shqipëri. Këta të fundit do të duhet të akomodohen në hotele, njëlloj siç është vepruar deri më tani.
“Duke filluar nga data 4 Maj, personat që do të riatdhesohen dhe që janë me banim ne zonat e kuqe do të vetekarantinohen në banesë me kushte strikte dhe nën monitorim të rreptë. Ndërsa të riatdhesuarit që banojnë në zonat jeshile do të vijojnë karantinën në strukturat akomoduese të percaktuara”, tha Manastirliu. Në përfundim, Manastirliu foli dhe për mundësinë e hapjes së bar- lokaleve dhe berberëve/parukerive në Shqipëri. Ministrja e Shëndetësisë u shpreh se është bërë një draft plan dhe se pas datës 18 maj do të diskutohet nëse do të hapen baret e lokalet, ndërsa për berberët/parukeritë do të shihet hapja e tyre, duke filluar nga 11 maji.
“Në planin tonë të dy javëve që do të pasojnë, duke filluar nga data 11 Maj e në vijim, planifikojmë të vijojmë me disa lehtësime masash, por me protokolle rigoroze sigurie për një grup tjetër biznesesh, siç janë parukeritë, berberë, dentistë dhe dyqane në qendra tregtare. Nga java që nis do të njihen me protokollet specifike, dhe do duhet që këto subjekte të marrin masa për organizimin e shërbimit me kushtet e reja. Në vijim të draft-planit, dhe e përsëris draft-plan pasi do të vlerësohet situata në dinamikë, nëse të dhënat do të jenë të qëndrueshme, bazuar në kriteret e përcaktuara nga ekspertët, nga 18 Maji e në vijim, sipas disa hapave të mëtejshëm, do të vlerësojmë dhe hapjen e njësive të shërbimit, bare e restorante, vetëm për mjediset e hapura sipas protokolleve të ruajtjes së distancës dhe kushteve higjeno-sanitare”, tha Manastirliu./EXPRESS
