Daut Hoxha nga Ferizaj i Kosovës është i verbër, por kjo nuk e ka penguar atë të punojë si zdrukthëtar. Ai e ushtron këtë profesion prej 18 vjetësh. Edhe pse është i verbër Daut Hoxha bën dyer, orendi të ndryshme prej druri dhe miqëve u bën tabela shahu. Ai tregon se nuk ka frikë se mos lëndohet gjatë punës dhe ka mësuar t’i përdorë mjaft mirë edhe mjetet prerëse. Dauti është shembulli që tregon se nëse ke vullnet dhe dëshirë, mund t’ia dalësh.
“Këtë punë e bëjmë si familje prej viteve 70-ta, por unë me vëllezërit e mi kemi filluar pas lufte dhe jemi këtu prej rreth 18 vjetësh. E kam rutinë dhe zakonisht punoj kur nuk kam angazhime, se me nejt pasiv është shumë keq, mer vese të këqija. Unë jam aktiv dhe punoj, kjo nuk është ndonjë punë e zorshme. Punoj me vullnet, me qejf,” tha ai.
