Një 49-vjeçar është arrestuar ditën e sotme nga Policia e Sarandës pas operacionit të koduar “Deceiver”, teksa hiqej si prokuror duke mashtruar qytetarët për qëllime përfitimi, teksa kishte thyer edhe masën e arrestit shtëpiak, po për mashtrim.
Ai tentoi të mashtronte edhe efektivët, por pa rezultat. Gjithashtu u arrestua edhe një 19-vjeçar për armëmbajtje pa leje, pasi strehonte të dyshuarin në banesën e tij.
Si provë sekuestrohen arma e zjarrit, municion luftarak, si dhe dokumente të ndryshme që dyshohet se i ka përdorur 49-vjeçari, në këtë veprimtari kriminale.
“Në kuadër të këtij operacioni u bë e mundur kapja dhe arrestimi në flagrancë i shtetasve A. M., 49 vjeç, banues në Tiranë, për veprat penale “mashtrimi”, “përvetësimi i titullit apo i detyrës shtetërore” dhe “largimi i të burgosurit nga vendi i qëndrimit”, si dhe E. Ç., 19 vjeç, banues në Sarandë, për veprën penale “mbajtja pa leje dhe prodhimi i armëve, armëve shpërthyese dhe i municionit”, bëri me dije policia vendore.
Nga hetimet dyshohet se duke u prezantuar si prokuror dhe duke i premtuar se do të paguheshin nga institucioni i Prokurorisë, A. M. ka punësuar disa persona në shërbim të tij, të cilëve i ka shkaktuar dëm të konsiderueshëm ekonomik. Gjithashtu, ka kërkuar favore në institucione dhe subjekte të ndryshme.
“Nga verifikimet e kryera, rezultoi se 49-vjeçari ishte në kërkim pasi kishte thyer masën e sigurisë “arrest në shtëpi”, caktuar nga Gjykata, për veprën penale “mashtrimi”, pasi është paraqitur në institucione dhe iu ka marrë para qytetarëve, duke u prezantuar si prokuror”, bëri me dije policia.
Në vijim të veprimeve hetimore për dokumentimin e rastit, u krye edhe kontroll në banesën e E. Ç., në Sarandë, ku qëndronte i kërkuari.
“Gjatë kontrollit u gjetën dhe u sekuestruan në cilësinë e provës materiale, 1 armë zjarri automatik tip “Shars”, municion luftarak dhe dokumente të ndryshme zyrtare, radio si të Policisë dhe një kompjuter të cilat dyshohen se janë përdorur nga shtetasi A. M., për mashtrime”, bëhet me dije në njoftimin zyrtar.
Materialet iu referuan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme procedurale”.
