Joe Biden është rifutur fuqishëm në garën për nominimin si kandidati demokrat për zgjedhjet presidenciale të 3 nëntorit.
Ish-zëvendëspresidenti Joe Biden ka triumfuar në garën e katërt për zgjedhjet nominuese presidenciale.
Kandidati demokrat mori të shtunën mbi 48 për qind të votave në shtetin e Karolinës e Jugut, duke u ngjitur në vend të dytë dhe duke rritur shanset për të qenë ai pretendenti përballë presidentit Donald Trump.
Mbështetja më e madhe erdhi nga votuesit afroamerikanë, që është komuniteti vendimtar në shtetin perëndimor të Amerikës.
“Ne mund të besojmë sërish, pasi jemi më të mirë se ky presidenti që kemi. Ishin ju që çuat në presidencë Bill Klintonin dhe Barak Obamës dhe tani motivi i fushatës tonë është të mundim Donald Trump-in,” theksoi kandidati 77-vjeçar.
Kryesuesi aktual i primareve, Bernie Sanders, mori më pak se gjysmën e votave të Biden, apo mbi 19 për qind, ndërsa ndjekësi i tij, Tom Steyer me 11 për qind njoftoi tërheqjen finale nga gara për nominim.
Rivalët e tjerë, ish-kryebashkiaku Pete Buttigieg, i treti në listën e kandidatëve demokratë për presidentë dhe senatorja Elizabeth Warren, aktualisht e katërta, secili morën më pak se 9 për qind të votave.
Tashmë gara më e rëndësishme zhvendoset të martën kur votohet njëkohësisht në 14 shtete dhe ku përcaktohet ndarja e rreth një të tretës së delegatëve në këtë fazë primare, mes tyre edhe shtetet më të populluara, si Kalifornia dhe Teksasi.
