Kryeministri Edi Rama vijon të jetë mjaft aktiv me mesazhe në “Facebook”, lidhur me situatën dramatike të krijuar nga tërmeti katastrofik me magnitudë 6.4 i ndjekur nga një sërë lëkundjesh të tjera të forta. Në një mesazh të fundit, Rama shpreh mirënjohje për ekipet e kërkim-shpëtimit, të cilët kanë shpëtuar deri më tani nga rrënojat mbi 650 persona, ndërsa 31 të tjerë fatkeqësisht janë nxjerrë të pajetë.
Mesazhi i Ramës:
Edhe kjo mund të ishte thjesht një PHOTO OF THE DAY. Por asisoj, fotoja e ditës nuk do të thoshte dot se sa shumë mirënjohje meriton sot, kjo trupë e shkëlqyer djemsh e vajzash, si të dalë nga ndonjë film skematik amerikan i luftës mes së mirës e të keqes – ku fituesi i luftës shihet qysh në fillim dhe tërë peripecitë e tij gjatë filmit kalohen kollaj, pasi fundi dihet🤩
Të bukur, të fortë, të aftë, të disiplinuar dhe të palodhur deri në përmbushjen me sukses të misionit, ata janë ndoshta produkti më spektakolar që ka nxjerrë lufta e Kosovës, në funksion të paqes së dinjitetshme, siç janë padyshim shembëlltyra më imponuese e shtetkrijimit të Kosovës🇽🇰
Kjo trupë do të lerë në kujtesën time, bashkë me gjurmën e pashlyeshme të kontributit të saj human, në një ditë kaq të zezë fatkeqësie për Shqipërinë, shijen e paharrueshme të një shfaqjeje heroizmi jetësor, ku heronjtë ta mbushnin plot syrin, mu si nëpër filmat amerikanë😉
