Efektivët janë futur në kampin e MEK në Manzë paraditen e sotme dhe po ushtrojnë kontrolle.
Mësohet se shtetasit iranianët që banojnë në kampin e muxhahedinëve MEK janë përplasur me policinë.
Raportohet se përplasja ka ndodhur për shkak se një pjesë e banorëve brenda kampit nuk kanë pranuar kontrollet.
Raportohet se kontrollet po ushtrohen me urdhër të GJKKO-së dhe janë sekuestruar servera.
Policia e Shtetit ka dalë me një njoftim zyrtar për kontrollet në ambientet e kampit të muxhahedinëve në zonën e Manzës.
Sipas policisë, “në zbatim të vendimit të Gjykatës së Posaçme kundër Korrupsionit dhe Krimit të Organizuar dhe të urdhrit të ekzekutimit të Prokurorisë pranë kësaj Gjykate, për kontrollin e të gjitha ambienteve dhe zyrave ku banojnë për qëllime humanitare, Policia e Shtetit, në kuadër të një plani operacional, ka filluar kontrollin e të gjitha ambienteve dhe zyrave në kampin MEK, në Manëz, Durrës”.
“Në zbatim të urdhër-kontrolleve të nxjerra nga Gjykata, Policia e Shtetit ka marrë masa për zbatimin e tyre, me planin e kontrollit të ambienteve në territorin e kampit MEK, duke zbatuar me rigorozitet etikën dhe komunikimin e duke respektuar të drejtat dhe liritë themelore të të gjithë qytetarëve dhe komunitetit që banon në këtë kamp”, thuhet në njoftim.
Ndërkohë grupet e kontrollit të Policisë po vijojnë kontrollet në territorin e kampit MEK dhe në ambientet e brendshme të tij. Në përfundim të kontrolleve do të ketë njoftim më të detajuar.
