Që prej ditës së djeshme prokurorët e SPAK kanë nisur punën, pasi u prezantua edhe Kryeprokurori Arben Kraja. Qytetarët kanë nisur gjithashtu të dorëzojnë kallëzimet e para.
Kallëzuan në SPAK:
Arben Myzeqari
Vilson Çobani
Faslli Marku
Bujar Mysli
Bardhyl Ibro
Nisma Thurje
Pritshmëritë për Prokurorinë e Posaçme SPAK janë të larta, dhe qytetarët po e shprehin këtë gjë me denoncime të cilat kanë filluar ti depozitojnë pranë zyrave të prokurorisë anti korrupsion dhe antikrimit të organizuar. Disa qytetarë kanë dorëzuar kallëzime sa i takon çështjes së pronave. Të tjerë kërkojnë hetime për prokurorë dhe gjyqtarët dhe të tjerë kërkojnë ende drejtësinë e pagjetur.
Arben Myzeqari është njëri nga denoncuesit që ka shpresë tek SPAK . Ai kërkon hetime për një varg akuzash por në vetvete lidhen me një pronë shtetërore në Fier me sipërfaqe 460 metra katrorë.
Myzeqari: Kam kallëzuar për veprën “organizatë kriminale”, kam kallëzuar kundërshtarin tim që kam prej 8 vite e gjysmë që luftojmë me të dhe prokurorë dhe gjyqtarë pasi nuk kemi të bëjmë thjeshtë me krimin e vjedhjes së pasurisë private, por më shumë unë tani do të luftoj për pronë shtetërore.”
Myzeqari ka testuar më herët disa prokurori e tashmë mendon që çështjen e tij mund ta zgjidhe vetëm SPAK.
Anila: Pse ke pritshmëri nga SPAK-u?
Unë kam pritshmëri nga SPAK, sepse është i vetmi institucion i cili do të ketë mbështetjen e Shteteve të Bashkuara të Amerikës. Vetëm te Amerika kam shpresë dhe mundësisht ti shisja të gjitha dhe të ikja.
Anila: Të kanë lodhur?
Jashtë mase (me lot në sy), më kanë lodhur dhe padrejtësisht. Sepse thonë që e drejta e vonuar është e mohuar, mua më është mohuar e drejta. Unë tani nuk kërkoj më drejtësi, unë kërkoj vetëm zbardhjen e të vërtetës.
Sikurse 55 vjeçari , kallëzime dorëzuan gjatë ditës edhe qytetarë të tjerë, mes tyre Vilson Çobani i cili prej vitesh ankohet në të gjitha gjykatat për gjyqtarët e prokurorët, ndërsa përmes avokatit të tij dorëzoi kallëzim penal edhe Arber Çekaj i cili pretendon se i kanë falsifikuar te dhënat e hyrje daljeve nga sistemi tims.
