Bashkia e Përmetit ka bërë gati projektin teknik dhe qeveria, përmes Fondit Shqiptar të Zhvillimit do të investojë për ndërtimin e urës së re në fshatin Kaludh.
Ministrja e Turizmit dhe Mjedisit, Mirela Kumbaro publikoi sot në rrjetet sociale foto të urës ekzistuese dhe projektin teknik të urës së re.
“Fshati Kaludh ndodhet në Përmet, i ndarë në mes nga lumi Vjosa. Ndodh shpesh që fermerët kanë shtëpitë në një anë e fermën në anën tjetër. Varrezat e fshatit në një anë e jetën e përditshme në anën tjetër. Pasarela që lidh dy gjysmat e fshatit varur mbi lumin e egër të Vjosës, ndonëse mirëmbahet nga bashkia, është konsumuar shumë dhe kërkesa e kahershme e banorëve për një urë të re është më se e justifikuar”, shkroi Kumbaro.
“Ne e mbajtëm premtimin që u dhamë”, tha Kumbaro, teksa shtoi se, shumë investime janë bërë në ujësjellës e rrugë rurale, por prapë ka ende shumë nevoja të tjera në fshatrat e qarkut të Gjirokastrës për të përmirësuar infrastrukturën e fshatrave në një qark shumë të shtrirë e të thepisur.
