Në qytetin e Tepelenës janë investuar mbi 70 milionë lekë, duke e kthyer këtë qytet në një pikë referimi të turizmit juglindor dhe duke thithur investimeve të sipërmarrësve të zonës, që kanë shpenzuar rreth 30 milionë dollarë.
Kryeministri Edi Rama gjatë fjalës së tij, në Këndin e Fjalës në Tepelenë tha se ky është vetëm fillimi i një rruge të re, një perspektive të re.
“Këtu në Tepelenë janë investuar 70 milionë lekë, nuk e di se sa dekada ka pa u investuar kaq shumë në këtë qytet. Veç kësaj kemi dhe 30 milionë dollarë të investuara këtu nga njerëzit, nga sipërmarrës apo emigrantë për të ndërtuar këtu një të ardhme, një të ardhme të biznesit të tyre, të jetës së tyre. Kush mund ta imagjinonte përpara pesë apo gjashtë vitesh se njerëzit do të vinin këtu për të investuar, ndërkohë që kur ne morëm detyrën, Tërmeti (kryebashkiaku i Tepelenës), rezistonte në kushtet e një izolimi total, duke mbledhur plehrat e lëna ndër vite dhe ndërsa Tepelena ishte vetëm e lënë në një anë, që i kalonin anash e nuk i hidhnin as sytë, e jo më të investonin”, – tha Rama.
“Rruga, që deri dje ishte një ëndërr, që shumëpak e mendonin që mund të realizohej, sot është realitet, që lidh Labërinë lart me detin poshtë, mbyll përfundimisht një histori të gjatë largësie dhe pamundësie mes Labërisë lart e Bregut poshtë dhe krijon kushtet për një zhvillim krejt tjetër. Ashtu sikurse Tepelena do bëhet pikë referimi për të gjithë ato që do të vijnë poshtë, e që si pasojë e infrastrukturës duan të ngrihen lart”, – tha Rama.