Moikom Zeqo përherë do të mbetet një nga emrat më të vlerësuar në Shqipëri dhe jo vetëm. I cilësuar si një nga zërat më të mençur të vendit tonë, Zeqo la lënë pas një trashëgimi të madhe. Një pjesë të kësaj pasurie, djali i tij, Epidamni, vendosi ta dhurojë për bibliotekën e “Fundjavë Ndryshe”.

Në një lidhje telefonike me emisionin “Historia e Fundjavës”, ai u shpreh se do të japë mbi 100 libra nga fondi i artë i “Mjeshtrit të Madh”.

“Janë libra të ndryshëm, poezi, prozë, studime arkeologjike, një larmi shumë e madhe. Por, jam fokusuar pak më tepër te librat për fëmijë. Që {babai} ka shkruajtur, që nga viti 1976-të, janë mbi 12 libra për fëmijë. Ndaj, duke qenë se biblioteka e “Fundjavë Ndryshe” është në një zonë si Brari, ku ka shumë fëmijë, këto libra do t’i shërbejnë shumë. Edhe si një lloj edukate për të vlerësuar diturinë,” u shpreh Epidamn Zeqo.

Moikom Zeqo ka qenë një nga mbështetësit kryesor të kauzës së “Fundjavë Ndryshe”. Madje edhe daljen e fundit publike, e pati në ambientet e Qendrës së Solidaritetit, pas tërmetit të 26 nëntorit.

“Një Fundjavë Ndryshe” mua më duket një titull shumë i gjetur. Por unë e zgjeroj koretacionin e kësaj shprehje. Unë do të thoja jo “Një Fundjavë Ndryshe”, por një Shqipëri ndryshe.

Vetëm rinia mund të ndalojë një katastrofë, që është me e keqe se katastrofa natyrore. Katastrofa natyrore prishi 100 shtëpi. Për fat të keq ka patur edhe të vdekur. Katastrofa sociale do të thotë që zhduket atdheu shqiptar. Nëse ne e shpopullojmë këtë vend, sidomos nga rinia, atëherë s’do ketë Shqipëri.

Misioni që keni juaj është i shpresës, jo vetëm e javës ndryshe, por edhe e historisë ndryshe. Juve bravo ju qoftë në këtë që bëni. Juve emanciponi kombin.”, rrëfeu ndër të tjera z.Zeqo.

Ndërsa themeluesi i “Fundjavë Ndryshe”, Arbër Hajdari u shpreh se këto fjalë nuk do t’i harrojë asnjëherë. Pasi janë fjalë me peshë shumë të madhe, të cilat duhet të ndiqen nga të gjithë, veçanërisht rinia.