Policia e Fierit ka marrë masa të ashpra për pronarin e një biznesi në Divjakë, duke e gjobitur me 1 milionë lekë. Policia bën me dije se shtetasi D.S, pronari i një lokali, pavarësisht thirrjeve të qeverisë, orës policore dhe gjobës së parashikuar, vijonte ta mbante hapur lokalin, duke thyer kështu masat që janë vendosur për të parandaluar përhapjen e Covid-19.

Drejtoria Vendore e Policisë Fier apelon për të gjithë administratorët e lokaleve dhe qytetarët që të respektojnë me korrektësi masat anticovid, për të bërë të mundur shkëputjen e zinxhirit të infektimit nga virusi, dhe fton qytetarët që të denoncojnë në 112 e Komisariatin Dixhital, cilindo pronar lokali apo qytetar që nuk i respekton këto masa kufizuese, duke u kthyer në burim rreziku për shëndetin e qytetarëve.