Stina e pranverës po ofron ndryshime të shpejta të situatës meteorologjike dhe kështu parashikohen dhe këto tri ditë të fundjavës. Sipas Shërbimit Meteorologjik Ushtrak, dita e shtunë do të ndikohet nga kalimi i një fronti me reshje shiu në të gjithë Shqipërinë. Në pjesën bregdetare parashikohen shtrëngata me rrufe të izoluara.
Gjatë së dielës reshjet e shiut do të izolohen në pjesën veriore të vendit për t’i lënë vend kthjellimeve e vranësirave në zonat e tjera të vendit. Ndryshe situata do të paraqitet të hënën pasi moti i kthjellët do të mbizotërojë në vend me vranësira kalimtare përgjatë maleve. Era përgjithësisht do të fryjë nga kuadrati i jugut mesatare e hera herës e vrullshme në brigjet detare shoqëruar me valëzim të forcës 3 dhe 4 ballë. Temperaturat do të pësojnë rënie të dielën në mëngjes e ndërsa rritja e ndjeshme e tyre do të vijë mesditën e së hënës.