Ministrja Ogerta Manastirliu gjatë një deklarate për mediat ka bërë me dije edhe shifrat e rasteve aktive me Covid-19 në vendin tonë. Sipas ministres Manastirliu, kemi të konfirmuara me Covid-19 që nga fillimi i pandemisë, mbi 29 mijë raste duke prodhuar një incidencë, me 1042 raste për 100 mijë banorë. Manastirliu bëri me dije se aktualisht kemi 14 mijë raste aktive dhe se në spital janë të shtruar 420 pacientë.
“Aktualisht kemi të konfirmuara me covid 29837 raste, duke prodhuar një incidencë prej fillimit të pandemisë. Kemi 1042 raste për 100 mijë banorë. Duke bërë një krahasim me rajonin kjo incidencë është më e ulët se incidenca mesatare e rajonit dhe Evropës. Shtimi i rasteve ka shkaktuar një rritje të mesatares javore të rasteve.
Prej rasteve të konfirmuara 52% të rasteve janë femra dhe 42% janë meshkuj. Janë rritur edhe rastet aktive. Aktualisht kemi 14 mijë raste aktive apo 526 raste për 100 mijë banorë. Sa i përket fataliteteve, kemi 646 humbje jete, që i korrespondojnë 22.7% të fatalitetit për 100 mijë banorë.Vlerësohet se java e 46 është java që ka pasur rastet më të larta të vdekjeve, grupmosha është 65-75 vjeç. ”, u shpreh ministrja.
Ndërsa sa i përket kapaciteteve spitalore, ministrja u shpreh se ka ende kapacitete në tre strukturat Covid. Ndërkohë që spitali Covid4 është gati në momentin që do të jetë e nevojshme.
“Situata në spitale në të tre strukturat e dedikuara për trajtimin covid kemi të zëna 420 shtretër, 15-20% e shtretërve janë të lirë në tre struktura, ndërkohë që covid4 është gati në momentin që do të kemi një zënin e shtretërve”- tha Manastirliu.