E shtuna do të jetë ditë mësimi për shkollat publike të vendit dhe punë për mësuesit. Ky ka qenë vendimi i marrë nga qeveria dhe i shpërndarë sot nga Ministria e Arsimit.
Mësohet se do të zëvendësohen 4 ditët e pushimit që janë bërë më parë, ku më e fundit ishte data 21 mars. Sipas njoftimit, datat e propozuara për zëvendësimin e ditëve të humbura të mësimit janë 2 prilli, 30 prilli, 14 maji dhe 28 maji.
“Dita e punës e caktuar ditë pushimi në datën 18.03.2022, vendimi nr.161, “Për caktimin e ditës së hënë datë 21.03.2022” do të zëvendësohet në datën: 02.04.2022 (e shtunë)
-Ditët e punës të caktuara ditë pushimi (3 ditë) sipas urdhrit 18, datë 20.01.2022, “Për ndërprerjen e procesit mësimor në të gjitha institucionet publike dhe jo publike” do të zëvendësohen në datat:
30.04.2022 (e shtunë), 14.05.2022 (e shtunë), 28.05.2022 (e shtunë)
Kujtojmë se ministria e Arsimit mbylli për tre ditë shkollat e arsimit parauniversitar në të gjithë vendin për shkak të motit të keq dhe temperaturave shumë të ulta në janar. Po ashtu, së fundmi pushim u bë edhe e hëna e 21 marsit, krahas 22 marsit që është festë zyrtare, dita e Sulltan Noruzit.
Arsyeja e kësaj dite pushim, pra 21 marsi, ishte kursimi i energjisë elektrike, në kushtet kur gjithë bota dhe vendi po përballet me rritje të çmimit të energjisë. Ishin pushim jo vetëm shkolla, por gjithë administrata shtetërore.