Ish-deputeti socialist Alqi Bllako dyshohet se mund të jetë arratisur. Gjykata e Posaçme urdhëroi arrestimin tij për aferën e inceneratorëve, por Bllako nuk ndodhet ende në qeli, ndërsa ka shumë mister me procedurat që po ndiqen për të.
Në mesditë u tha se ai u shoqërua në polici, por në fakt nuk ka ndodhur kështu. Pasdite Gjykata e Posaçme dha masën e sigurisë “arrest me burg” për të dhe kanë kaluar disa orë nga marrja e vendimit, por nuk ka pasur asnjë njoftim nga policia. Mësohet se gjykata ka dorëzuar në polici kërkesën për arrestimin e Bllakos, por deri më tani nuk ka asnjë ekzekutim të urdhrit.
Policia nuk ka dhënë asnjë njoftim se çfarë po ndodh me vendimin e gjykatës. Dyshimet janë se Bllako mund të jetë arratisur dhe flitet se ka dalë jashtë vendit që ditën e djeshme. Ende nuk ka një konfirmim zyrtar, por në korridoret e policisë thuhet se ai tashmë ka ikur nga vendi. Mësohet se policia i ka shkuar në banesë dhe nuk e ka gjetur Bllakon. Po ashtu ish-deputeti rezulton se e ka të fikur telefonin, ndërsa krerët e policisë nuk japin informacion.
Dyshimet janë se Bllako po ecën në gjurmët e Adriatik Llallës, i cili u arratis në Itali. Lidhur me këtë skandal ka reaguar dhe gazetarja Klodiana Lala, e cila shprehet se policia nuk jep informacion. “Gledis Nano doli në konferencë të jashtezakonshme pas mesnate për arrestimin e Nuredin Dumanit, por nëse e gjetën ose jo Alqi Bllakon nuk thotë asnjë fjale. Heshtje totale nga policia për ish deputetin”, shkruan Lala. /Pamfleti/
