RE HX 112 është targa gjermane që zbuloi se Nikoll Sherrniku ishte personi që siguroi targat e makinës BMW Seria 5 që përdorën vrasësit në sulmin me armë në lokalin e Fatjon Muratit e Don Boskos.

Nga breshëritë e plumbave të qëlluara nga makina, më 12 Mars të 2023, humbi jetën banakierja e lokalit, Mimoza Paja. Shënjestër ishin familjarët e Fatjon Muratit, një personi me precedent penal.

Targat gjermane u futën në Shqipëri afro 9 muaj para ngjarjes nga Sherrniku i cili prej Gushtit 2022 ndodhet në burg për një arsenal armësh që iu kap teksa lëvizte me makinë në qytetin e Lezhës.

Targat janë identifikuar nga pamjet filmike që ka administruar policia në zonën ku ndodhi ngjarja, ndërsa blerja e tyre nga 28-vjeçari është konfirmuar edhe nga përfaqësuesit e servisit në Gjermani ku u morën nga Sherrniku.

Megjithatë, Sherrniku, të cilit iu komunikua masa e arrestit në qeli, ka refuzuar të flasë lidhur me këtë çështje.

Policia dyshon se sulmi me armë ishte pjesë e një zinxhiri përplasjesh mes dy grupeve kriminale rivale, një version ky që po përforcohet edhe pas zbulimit së të pronësisë së targave të mjetit të përdorur në atentat.