2 shkurti – Dita Ndërkombëtare e Ligatinave është një nga 30 ditët e kalendarit mjedisor dhe kjo ditë, si edhe ditët e tjera mjedisore, nga institucionet e ndryshme në mbarë botën, merret si shkas për të treguar përkushtimin ndaj ruajtjes së natyrës dhe mjedisit. Ligatinat (tokat e lagura) përfshijnë afër 6 % të sipërfaqes së përgjithshme të globit dhe janë ndër mjediset më produktive. Ato konsiderohen si “djep i diversitetit biologjik”, duke ofruar ujin dhe produktivitetin primar për ekzistencën e llojeve të shumta të bimëve dhe shtazëve. Theksojmë se pas ekosistemeve pyjore, ekosistemet e ligatinave janë ekosistemet me biodiversitetin më të bujshëm dhe këto ekosisteme janë të rëndësishme sidomos për faktin se janë hapësira jetësore të shumë llojeve të zogjve.
Kompleksi dhe ndërveprimi i faktorëve fizik, kimik dhe biologjik i ekosistemeve ligatinore, mundëson që të kryejë shumë funksione, si p.sh. deponimin e ujit, depozitimin e shkarkimeve të shirave dhe rrjedhjeve ujore, stabilizimin e kushteve klimatike, kontrollimin e përmbytjeve, shtrëngatave dhe të erozionit. Në kuadër të projektit Acap, përfaqësues nga organizata jo fitimprurese (Cosv, Inca, Celim, PPNE), përfaqësues nga Adzm Vlorë, përfaqësues nga komuniteti, nxënës të shkollës Industriale Vlorë dhe ‘Pilo Prifti’ Novoselë, grupi vullnetarë i fëmijëve “Junior Rangers”, në këtë ngjarje të rëndësishme kanë organizuar një aksion në Lagunën e Nartës.
Laguna e Nartës është një prej ligatinave me vlera të rralla natyrore dhe vendbanim i shumë llojeve të zogjve. Në këtë aksion, janë mbjellë 400 rrënjë pishe, është bërë pastrim i zonës dhe i është kushtuar një vëmendje e posaçme edhe vëzhgimit me dylbi të shpendëve të lagunës nga fëmijët, me ndihmën e ekspertëve të fushës. Aksione të tilla duhet të inkurajohen për ta kthyer kthyer këtë Peizazh të Mbrojtur në një atraksion të shkëlqyer për shumë turistë që e vizitojnë atë duke promovuar kështu vlerat që ka vendi ynë.
Nga |Sonila Xhemali|