Marrja e presidencës amerikane nga demokrati, Joe Biden, shpresohet se do të hapë një kapitull të ri në raportet mes SHBA-së dhe Bashkimit Evropian. Dy zyrtarët më të lartë të BE-së, kryekomisionerja, Ursula von der Leyen, dhe shefi i Këshillit Europian, Charles Michel, nuk e fshehën të mërkurën lumturinë e tyre për ardhjen e Biden, duke e cilësuar si aleatin që ka nevojë Evropa dhe bota, pas republikanit, Donald Tramp.
“Pas katër viteve të gjata, Evropa ka tani një mik në Shtëpinë e Bardhë. Ky agim i ri në Amerikë është momenti që e prisnim prej kohësh. Jemi gati për një fillim të ri me partnerin tonë më të vjetër dhe më të besuar,” tha Ursula von der Leyen.
“Ndajmë vlera, interesa të përbashkëta, lidhje kulturore dhe historike, dhe realitetin gjeopolitik. Në këtë ditë të parë mandati, i drejtoj një propozim solemn presidentit të ri amerikan. Të bëjmë pakt për një Europë më të fortë, për një Amerikë më të fortë, për një botë më të mirë,” u shpreh Charles Michel.
Presidenca e demokratit Biden është mirëpritur nga krerët e shteteve të BE-së, pasi ai është zotuar për një kurs tjetër nga Trump për objektivat dypalësh dhe globalë. “Presim partneritetin e SHBA-së në shumë fronte: në adresimin e pandemisë së Covid-19, të krizës klimatike, të çështjeve të sigurisë, të kontrollit të armëve dhe çarmatosjes, dhe të shumë konflikteve që kërkojnë vëmendje urgjente,” shtoi me një mesazh edhe presidenti i Gjermanisë.
Hasan Ruhani, presidenti i Iranit, po ashtu deklaroi të mërkurën se administrata Biden mund të hapë perspektiva të reja për Teheranin, për marrëveshjen shumëpalëshe bërthamore dhe për mbylljen e fushatës së presionit maksimal që nisi presidenti Trump. “Erdhi fundi i epokës së një tirani, dhe e sotmja është dita finale e sundimit të tij. Katër vite nuk i sollën asnjë fryt, përveçse padrejtësi, korrupsion dhe probleme për qytetarët e tij dhe të botës,” deklaroi presidenti iranian.
