Qeveria shqiptare rikthen nismën për ndryshime ligjore që lejojnë bashkëjetesën mes personave të së njëjtës gjini. Kjo kategori do të njihet ligjërisht me ndryshimet në kodin e familjes, duke u dhënë mundësinë e birësimeve. Anëtarët e LGBTI, në bazë të kësaj pakete, bëhen edhe përfitues nga projektet e strehimit.
Edhe anëtarët e komunitetit LGBTI+ do të kenë të drejtën e birësimit të një fëmijë, apo të regjistrimit të foshnjes. Qeveria shqiptare ka rikthyer diskutimin për lejimin e birësimit dhe për rastet kur çifti nuk është burrë dhe grua.Në planin kombëtar të veprimit për personat LGBTI+ parashikohet ndryshimi i kodit të familjes, kodit penal dhe ligjit të birësimit.
Në propozimet e bëra me herët nga komuniteti LGBTI + për këtë pikë kërkohet që neni 163 që saktëson termin “mes burrit dhe gruas që jetojnë në çift, e karakterizuar nga një jetë e përbashkët, që paraqet një karakter stabiliteti dhe vazhdueshmërie” të zëvendësohet “mes 2 personave që jetojnë në çift, e karakterizuar nga një jetë e përbashkët, që paraqet një karakter stabiliteti dhe vazhdueshmërie”.
Projektligji parashikon ndërhyrje në kodin e familjes për lejimin e bashkëjetesës për personat nga e njëjta gjini. Sipas projektit të qeverisë, këto ndryshime duhet të nisin në gjashtëmujorin e dytë të vitit 2024. Një tjetër ndryshim propozohet dhe për njohjen të identitetit gjinor, ku në fillim të vitit 2022 do të propozohet dhe miratimi i ligjit për këtë çështje. Në dokument thuhet se këtyre nismave legjislative duhet t’u jepet prioritet në periudhën e ardhshme, me qëllim që legjislacioni shqiptar të përputhet me standardet ndërkombëtare dhe ato të BE-së.
Një tjetër projekt është dhe ndryshimi i ligjit të strehimit ku komuniteti LGBTI + do të përfshihet mes grupeve përfituese. Për të mos lejuar diskriminimin, qeveria shqiptare kërkon fuqizimin e kapaciteteve në njësive vendore, por dhe të institucioneve të drejtësisë, të cilat duhet të raportojnë dhe të mos lejojnë diskriminimin.
Nga ana tjetër shihet e nevojshme përgatitja dhe përfshirja e moduleve të trajnimit mbi çështjet LGBTI+ në kurrikulat e ASPA, në Universitete, në Shkollën e Magjistraturës, në Akademinë e Sigurisë, etj. Strategjia që do të zgjasë deri në vitin 2027 do të ketë një kosto prej 72 milionë lekësh, 61 përqind e së cilës do të përballohet nga buxheti i shtetit.
