Reperi i famshëm Kastriot Rexha, i njohur si Majk, është rikthyer me nënën e djalit, Majlinda Zekën, tri vite pas ndarjes së tyre të bujshme
E vetëm një muaj pasi ai la brenda natës të dashurën e fundit, faktet flasin se Majk është ribashkuar me Majlindën duke gëzuar së bashku këtë atmosferë festash.
Ishte Majlinda ajo që publikoi një foto me Roanin në profilin e saj në “Instagram”, dhe Majk ka habitur me veprimin që ka bërë.
Reperi e ka rishpërndarë këtë foto në “Instagram”-in e tij dhe e ka shoqëruar me dy emoji me zemra, duke dhënë mesazhin e tij në publik se ata tashmë, Majlinda dhe Roani, janë dy njerëzit e tij të zemrës.
Gjithashtu, ai e ka çuar më tej këtë mesazh ribashkimi, pasi ka komentuar me dy zemra në foton e Majlindës, duke na bindur se ata tashmë janë një familje.
Majk, i cili sapo ka lançuar klipin e parë me Getoar Selimin, “Hajde te baba”, pjesë e albumit të tyre “Vaksina”, para një muaji u përfol për ndarjen spektakolare brenda natës nga e dashura “Miss Universe Kosova 2020”, Blerta Veseli.
Ishin disa media të Kosovës që publikuan lajmin se çifti ka frekuentuar vende të njëjta, përmes postimeve në “Story”-t e “Instagram”-it, ku shiheshin tek pozonin me sfond të ngjashëm dhe në momente thuajse të njëjta.
E pas këtyre thashethemeve, ishte vetë vajza bionde që e vërtetoi këtë fakt. Në “Instagram”- in e Blertës u postua një selfie e Majk me mbishkrimin “Hacked”, e cila u konsiderua një “përgjigje” ndaj zërave të këtyre ditëve për një lidhje të mundshme mes saj dhe reperit të famshëm të “Babastars”.
Por me shpejtësinë e dritës postimi i saj në “InstaStory” u fshi nga profili i Blerta Veselit, duke ndezur një tjetër debat mes komentuesve.
Nuk vonoi shumë dhe brenda 24 orësh, Majk e fshiu Blertën nga miqtë e “Instagram”-it, i acaruar me të dhe mediat online që shpërndanë pa pyetur atë detaje nga jeta e tij private, të cilën ai me fanatizëm po e ruan të fshehtë që pas ndarjes nga Majlinda Zeka, modelja e “Instagram”-it me të cilën kanë një djalë.
Sipas burimeve pranë çiftit, Majk i dha fund brenda natës historisë me Miss-in, sepse Majk ishte nevrikosur me faktin që Blerta postoi foton e tij në “Instagram”, me dëshirën për “ta privatizuar” Majkun. Por duket se strategjia nuk i eci ashtu si duhet, pasi Majku 30-vjeçar mori vendim drastik.
Ndërkohë, historia e Majk me miss-in Blerta Veseli mund të themi se është e para që mori përmasa mediatike dhe e fundit, tri vite pas ndarjes nga nëna e djalit të tij Roan, Majlinda Zeka.
HISTORIA E MAJK ME MAJLINDËN ÇUDITI BOTËN E SHOWBIZIT, REPERI MËSOI SE PO BËHEJ BABA KUR LIDHJA KISHTE MARRE FUND
Po le të kujtojmë se ç’ndodhi tri vite më parë mes Majkut dhe Majlindës, historia më e paparë e që tronditi botën e showbizz-it tri vite më parë? Dy muaj pasi erdhi në jetë djali Roan, Majk vendosi të postonte fotot e para me të birin nga lidhja me modelen e “Instagram”-it, Majlinda Zekën.
Më në fund ai pranoi statusin e babait, pas një periudhe të gjatë paqartësie në publik nëse ai ishte babai biologjik i fëmijës ose jo. Kjo situatë konfuzioni u krijua pasi ai i kishte dhënë fund lidhjes me Majlindën, ndërkohë që ajo deklaroi se ishte shtatzënë.
Reperi i “Babastars”, Majk, nuk e pohoi asnjëherë, por as e mohoi faktin që ai ishte babai i fëmijës deri në momentin që fëmija erdhi në jetë. Më pas ai vendosi të bënte një postim në “Instastory”, duke lënë të kuptohej se ai u bë baba, edhe pse lidhja me Majlindën kishte marrë fund.
Ish-e dashura e tij, Majlinda Zeka, solli në jetë fëmijën e tyre, duke e pagëzuar me emrin Roan.
Dukej se marrëdhënia e tyre ishte problematike kur fëmija erdhi në jetë, pasi ajo fillimisht e regjistroi djalin me mbiemrin e saj, dhe jo të Majkut.
Në “Instagram”, ajo publikoi foto të djalit pas lindjes me statusin: “Çdo sakrificë për ty ia vlen, mirë se erdhe në jetë Roan! Bota ime. Faleminderit Allah!”.
Në këtë postim kuptohej që ajo po e gëzonte e vetme statusin nënë, e braktisur nga babai i djalit. Por më vonë, Majk i dha fund enigmës që i ngjasonte një telenovele të vërtetë, duke bërë postimin e parë si baba.
Ai publikoi një foto me djalin 2 muajsh, ndërsa flinte në kraharorin e tij, foto mbi të cilën kishte vendosur thjesht mbishkrimin “Roan”.
Ishte ky pikërisht postimi që u dha fund pikëpyetjeve. Edhe pse Majk dhe Majlinda isjhin ndarë, flitej se ata gjatë një takimi në një nga kafet e Prishtinës ranë dakord që të kujdeseshin bashkë për fëmijën.
Historia e dashurisë dhe ndarjes e reperit Kastriot Rexha me Majlindën bëri bujë në rrjetet sociale, për faktin se ajo më parë u mbyll sesa filloi.
Çifti më interesant i showbiz-it i dhanë fund lidhjes për çështje xhelozie, vetëm pak javë pasi Majk e bëri publike historinë e tij. Ai ndau me fansat foton e parë me Majlindën, duke deklaruar se ndihej i bekuar pranë saj.
Por çiftit nuk i zgjati shumë lidhja romantike, pasi vetëm pas pak javësh histori, Majk dhe Majlinda i fshinë të gjitha fotografitë e tyre të përbashkëta, duke mos lënë asnjë gjurmë në llogaritë e tyre në “Instagram”.
Ata fillimisht e kishin mbajtur të fshehtë romancën për disa muaj dhe për çudinë e të gjithëve i dhanë fund kur dolën hapur.Ndërkohë, ata kanë hedhur pas krahëve inatet duke reflektuar dhe duke u rikthyer si një familje me të vërtetë e bukur dhe e lumtur./Panoramaplus.al
