Në Malësinë e Madhe është zbuluar një tjetër rast i kultivimit të bimëve narkotike me anë të llambave. Mësohet se gjatë një kontrolli të befasishëm në Rrugën e Culajve, në Malësi të Madhe, në biznesin (bar-restorant-hotel), në pronësi të shtetasit F. E., i cili ia kishte dhënë me qira këtë ambient, shtetasit K. N. është zbuluar kultivimi i kanabisit me llamba.
Në katin e parë dhe të dytë të godinës u gjetën dhe u sekuestruan në cilësinë e provës materiale 300 bimë të dyshuara narkotike, të kultivuara në vazo, 1.3 kg lëndë e dyshuar narkotike cannabis sativa dhe 230 llamba me stabilizator. Pronari i pronës i cili ia kishte dhënë me qira shtetasit K.N është proceduar penalisht ashtu si edhe 4 punonjës të OSHEE-së pasi akuzohen për veprën penale “Shpërdorimi i detyrës”.
Njoftimi i plotë:
Malësi e Madhe, Finalizohet operacioni policor i koduar “Culaj”.
Përshtatën ambientin e marrë me qira (bar-restorant-hotel), për kultivimin e bimëve narkotike me anë të llambave, shpallen në kërkim 2 shtetas. Procedohet penalisht pronari që kishte dhënë me qira ambientet në pronësi të tij. Procedohen në gjendje të lirë edhe 4 punonjës të OSHEE-së. Strukturat e Komisariatit të Policisë Malësi e Madhe, në bashkëpunim me specialistët për Hetimin e Narkotikëve dhe Trafiqeve të Paligjshme në DVP Shkodër, në kuadër të masave të marra për parandalimin dhe goditjen e aktivitetit kriminal të kultivimit të bimëve narkotike, si dhe bazuar në informacionet e siguruara për përshtatjen e një ambienti për kultivimin e bimëve narkotike, organizuan dhe finalizuan operacionin policor të koduar “Culaj”.
