Ministrja e Shëndetësisë Ogerta Manastirliu dhe kryeministri Edi Rama kanë vizituar stadiumin Air Albania, ku pritet të kryhet procesi i vaksinimit për të paktën 10 mijë persona. Ministria e Shëndetësisë ka bërë gati vendin ku do të bëhet doza e parë e vaksinës Pfizer dhe vendet ku do të qëndrojnë për 30 minuta secili prej të vaksinuarve.
Në ditën e parë të vitit 2021, Rama u shpreh se ka siguruar 500 mijë doza të vaksinës, por fillimisht do të vijnë 10 mijë dhe muajt në vijim do të arrijnë të tjera.
Ogerta Manastirliu: Do të kemi skuadrat e mjekëve dhe koordinatorët që do e lehtësojnë këtë proces. Do të kryhen disa procese. Fillimisht do të ulen në poltrona, do plotësohet nga mjeku anamneza dhe më pas do të vaksinohen e të qëndrojnë ulur për 30 minuta. Do të jenë 60 postacione dhe brenda një ore të vaksinohen 60, ndoshta më shumë qytetarë dhe të vijojë 8-10 orë në ditë procesi.
Vaksinat e para që do të vijnë i dedikohen grupeve të riskut dhe aktualisht kemi bërë të gjitha listat e mjekëve dhe infermierët e katër spitaleve Covid dhe më pas me mjekët, infermierët të urgjencave e reanimacioneve. Do të bëhen një javë në këto ambiente dhe sigurisht jemi në fazën ku po trajnojmë të gjithë ata që do të jenë pjesë e këtij procesi.
Do të vijojmë paralelisht me Tiranën, më pas me Vlorën e Shkodrën dhe qendrat e tjera në të gjithë vendin. Ne kemi kapacitetet për të pritur deri në 30 mijë vaksina. Jo vetëm për ti bërë ato, por për çështjen e zinxhirit ftohës. Kemi kapacitetet për të pritur deri në 30 mijë vaksina, kemi siguruar kapacitetet frigoroferike dhe po punojmë për t’i rritur këto kapacitete.
Për depot frigoriferike i kemi sepse janë bërë këto investime dhe për rrjetin e vaksinave AstraZeneca, 4-8 gradë është pjesë e qendra shëndetësore sepse kanë kapacitetet dhe frigoriferët dhe është vaksinë më e lehtë.
