Ministrja e Shëndetësisë Ogerta Manastirliu, në një lidhje direkte me emisionin “Opinion”, i mëshoi faktit se bizneset e hapura dhe ato që pritet të hapen javën e ardhshme, duhet të ndjekin disa protokolle të higjienës, ku përmendi ato të dezinfektimit, ajrimit apo xhamit mbrojtës në banak.
Pjesë e shkëputur nga intervista:
Blendi Fevziu: Cilat biznese u hapën dhe me çfarë kriteri u hapën?
Manastirliu: Janë hapur bizneset e lidhura me shërbimet jetike, prodhimtarinë dhe që kanë rrezikshmëri jo të lartë. Data 27 Prill mendohet të hapë një seri biznesesh, dyqanet e veshjeve, tekstilet, mobiljeve, këpucët, lulet dhe materialet e teknologjisë. Sigurisht në masa të rrepta.
Fevziu: Çfarë masash?
Manastirliu: Bizneset do të kenë disa protokolle, sipas rrezikshmërisë së tyre. Praktikisht bizneset janë njohur përmes portalit e-albania me masat që duhet të marrin, të distancimit fizik, higjienës, dezinfektimit, ajrimit, xhamit mbrojtës në banak. Do të hapim edhe shërbimin e taksive dhe do të ketë një protokoll edhe për këtë shërbim.
Fevziu: Kur do të hapen taksitë?
Manastirliu: Dua të them se do të vlerësojmë çdo ditë ecurinë për të ndërmarrë hapa të tjerë, për të qenë të sigurt që nuk do na shkaktojnë problematika.
