Kryeministri Edi Rama deklaroi sot se do të mbyllen të gjitha pikat e karburantit që nuk taposin përfundimisht pompën manuale dhe nuk i dorëzojnë kupon konsumatorit.
Në një reagim pas aksionit të sotëm të nisur në terren për kontrollin e pikave të shitjes së naftës me pakicë në kryeqytet, Kryeministri Rama solli shembullin e mbylljes së një pike karburanti.
“Ja kështu si ky sot, do mbyllet çdo stacion karburanti që nuk tapos përfundimisht pompën manuale dhe nuk i dorëzon kupon konsumatorit”, thekson Rama.
Kontrollet për pikat e shitjes së naftës me pakicë do të vijojnë nga veriu në jug të vendit, në mënyrë që bizneset të zbatojnë ligjin.
Administrata Tatimore në bashkëpunim me Drejtorinë e Metrologjisë do të fokusojnë inspektimet gjatë muajit gusht në pikat e furnizimit të karburanteve në të gjithë vendin, në 1200 subjekte dhe 3200 pompa që regjistron ky sektor.
