Pas thirrjeve për tu dorëzuar, 35-vjeçari grek Kostandinos Kaçifas, ka qëlluar sërish në breshëri ndaj policisë, gjë që ka bërë që edhe policia të kundërpërgjigjet. Si pasojë e shkëmbimit të zjarrit mes policisë dhe 35-vjeçarit, ka humbur jetën ky i fundit.
Pas kësaj ngjarje të rëndë në Bularat të Gjirokastrës, mediet greke kanë shkuar më tej, duke e quajtur si hero 35-vjeçarin Kostandinos Kaçifas.
Me anë të një postimi në rrjetet sociale, gazetari Shpëtim Zinxhiria, teksa publikon një artikull të medies greke ANT1 News, shkruan: “Mediat greke e bejne hero ekstremistin, ne vend qe ta denojne kete ngjarrje…”
Më tej gazetari shprehet: “Ne vend qe te kerkojne falje dhe te denojne kete ngjarrje e bejne edhe hero, me justifikimn se ky ngriti flamurin grek, dhe policia shqiptare e uli ate, prandaj qelloi. Pyetja shtrohet po pse vajti me afrme per te ngritur flamurin nese biem dakord per nje cast me mediat greke.”
Kujtojmë se, 35-vjeçari grek që hapi zjarr sot ndaj policisë shqiptare e kishte paralajmëruar sulmin e tij 5 ditë më parë, në datën 23 tetor, përmes një postimi në rrjetet sociale.
Teksa shfaqet duke pozuar me flamurin e Viorio-Epirit, duket se i riu e kishte paralajmëruar ngjarjen në fjalë, ai shkruan “Grek ose vdekje”.
“Rama dhe Tsipras bëjnë plane pa nikoqirët. Për një gjë të jeni të sigurt. Rinia e Vorio Epirit nuk do të qëndrojë spektatore (nuk do bëj sehir). Thirren të gjithë grekët e Vorio Epirit që në 28 Tetor të dërgojnë një mesazh në çdo anë. Grek ose vdekje!”, shkruante Kostandinos Kaçifas në Facebook.
Pas breshërisë me kallashnikov mbi policinë e Gjirokastrës, në operacion janë angazhuar forcat RENEA nga Tirana për kapjen e tij. Vendodhja e tij u lokalizua, gjë që solli më pas fundin e rezistencës së 35-vjeçarit.
Kaçifa qëlloi me armë zjarri ditën e some në Bularat drejt policisë shqiptare, ndërsa po zhvillohej ceremonia për ushtarët e rënë grekë gjatë luftës së dytë botërore.
