Kancelarja gjermane, Angela Merkel është zotuar sot se do të kontribuojë me fonde të konsiderueshme në fushën e kërkimeve mbi vaksinën kundër COVID-19.
Në një video-konferencë me liderët e BE-së, Merkel theksoi se një vaksinë e mundshme kundër koronavirusit, do të duhet të vihet në dispozicion për të gjitha vendet. Sipas saj, kthimi i gjendjes në normalitet në të gjithë botën do të jetë i mundur, vetëm pas zhvillimet të një vaksine kundër virusit vdekjeprurës.
“Shkenca nuk është kurrë nacionale, shkenca i shërben njerëzimit”, theksoi Merkel, duke bërë thirrje për bashkëpunim më të fortë ndërkombëtar në përpjekjet për të zhvilluar një vaksinë kundër COVID-19. Nëse gjejmë një ilaç ose vaksinë, e testojmë dhe e aprovojmë atë, atëherë kjo duhet të jetë e disponueshme dhe e përballueshme për të gjithë botën”, tha ajo. Kujtojmë se shteti gjerman miratoi dje testet e para klinike, të një vaksine kundër koronavirusit tek njerëzit.
