SPAK kërkon të zbulojë qëllimet e video skandalit seksual
Ish-kryebashkiaku i Kukësit, Safet Gjici dhe Alma Kaçi, vajza me të cilën ai shfaqej në video skandalin seksual të publikuar disa javë më parë, janë marrë sërish në pyetje nga Prokuroria e Posaçme.
Burime pranë kësaj prokurorie i thanë Tv Klan, se qëllimi i hetuesve ka qenë zbulimi i personave të tjerë që mund të fshihen pas kësaj video si dhe qëllimet e regjistrimit të saj.
Këto të dhëna do ndihmonin SPAK për të vijuar hetimet për ish-kryebashkiakun, Gjici i vënë në akuzë për korrupsion pasiv, pas dyshimeve se ka favorizuar 40-vjeçaren në një projekt për strehimin dhe kujdesin ndaj qenve endacakë në Kukës.
Ndërkohë për vetë Alma Kaçin, të cilën gjykata e ka lënë në “arrest në shtëpi”, SPAK ka ngritur akuzën e korrupsionit aktiv. Vetë 40-vjeçarja ka pranuar se donte nga Gjici tenderin e qenve, ndërsa ish-kryebashkiaku ka mohuar kategorikisht akuzat.
