Apeli i Posaçëm i GJKKO-së ka shtyrë për më 31 gusht seancën për 6 të arrestuarit në kuadër të operacionit ‘Metamorfoza’.
Seanca e sotme zgjati rreth tre orë dhe asnjë nga personat e arrestuar, biznesmeni Pëllumb Gjoka, prokurori Xhevahir Lita, ish-shefi i Operacionales Oltion Bistri dhe ish-efektivi Ardit Hasanbegaj, Asmer Bilali, Edmond Preka, nuk ishte i pranishëm në sallën e gjyqit, por u përfaqësuan nga avokatët e tyre.
Avokati i biznesmenit Pëllumb Gjoka, Ylli Manjani, tha se për të lidhur një person me ngjarje kriminale duhet prova dhe jo hamendësime.
Reagimi i Gjykatës
Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtarja Saida Dollani, sot më 29.08.2023, zhvilloi seancë gjyqësore për çështjen penale nr. 38 akti, datë 22.08.2023 regjistrimi, regjistruar mbi ankimet e personave nën hetim P.Gj., Xh.L., E.P., A.H., O.B., ndaj vendimeve nr. 94, datë 23.07.2023 dhe nr. 97, datë 29.07.2023 (në lëndë të masave të sigurimit personal) të Gjykatës së Posaçme të Shkallës së Parë për Korrupsionin dhe Krimin e Organizuar.
Lidhur me këtë çështje, seanca gjyqësore për shpalljen e vendimit u shty për tu zhvilluar më datë 31.08.2023, ora 10:00.
