Poetja Mimoza Ahmeti është e para që nis një cikël leximesh nga poezia shqipe të titulluar “Poetët për poetët” iniciuar nga Qendra Kombëtare e Librit dhe Leximit. Poetja e njohur e viteve 90-të, shfaqet në një video, publikuar nga Qendra Kombëtare e Librit dhe Leximit, duke lexuar poezinë e saj më të re, të titulluar “Tjetri”. Por fabula e kësaj poezie duket interesante pasi Ahmeti, duket se flet për gruan e diktatorit, Nexhmije Hoxha. Duket se mes tyre ka pasur një keqkuptim. Për më shumë lexoni poezinë e shkruar prej Ahmetit.
“Tjetri”
Mimoza Ahmeti
Unë isha një poete e re, që ajo nuk e takoi asnjëherë. Ajo ishte një grua, “Diktatorja”, që unë nuk e takova asnjëherë. Ne patëm një takim simbolik: kisha shkruar një poezi për të dashurin tim, ku e quaja “hiena me sy të kaltereme”. Kisha shtuar: Prova e qëndresës sime! Gruaja “Diktatore” kishte kujtuar se këto vargje aludonin për të.
Kur “Diktatoren” e rrëzuan nga pushteti, kritiku më në zë i letrave dhe esteti, më thoshte që donte të shkruante një libër për mua. Se si diktatura më kishte censuruar dhe përndjekur. Unë nuk mund t’i shpjegoja atij se ajo poezi e mallkuar, që e kishte bërë atë grua të tërbohej, i kushtohej të dashurit tim. Kritiku estet më ndiqte. Vazhdoja t’i ikja, derisa ndërroi jetë. Po këtë vit, ndoshta nga Corona, ndërroi jetë edhe “Diktatorja”. Tani që ata të dy nuk janë, unë pa frikë mund të pohoj se diktati vjen nga keqkuptimi dhe se frika nga tjetri krijon fantazmën historike.
