Ministrja e Infrastrukturës dhe Energjisë, Belinda Balluku ka folur për betejën me koronavirusin duke zbuluar se cilat ishin mesazhet e para që i erdhën pasi të gjithë e mësuan se ishte e infektuar. Në intervistën për “Top Talk”, u shpreh se iu shfaqën shenja të lehta të sëmundjes dhe 8 ditët e para ishin tepër të vështira për të.
Megjithatë nuk i munguan mesazhet me receta nga pacientë të tjerë që ishin shëruar nga sëmundja. Për këtë Balluku thotë se u konsultua me mjekë dhe këtë i sugjeron të gjithëve.
“Askush nuk mund të thotë që është një përvojë e lehtë për ta kaluar, pavarësisht se unë i kisha simptomat e lehta, edhe temperatura e moderuar disi, edhe më pas nuk kam pasur këto simptomat e rënda të dhimbjeve të trupit. Megjithatë do të thoja që ka qenë një 8 ditësh intensiv aspak i këndshëm, do të ishte mirë që të gjithë ju që nuk jeni infektuar, të merrnit masa dhe të përkujdeseni për t’u mos infektuar nga koronavirusi. Jam ndjekur në shtëpi dhe nga mjekë. I falenderoj të gjithë ata që u kujdesën për mua gjatë asaj periudhe. Ditën e parë që u sëmura, filluan të më vinin në telefon receta nga pacient të mëparshëm.
Unë mendoj që rastet janë të ndryshme nga njëri-tjetrit, kështu që i jam drejtuar mjekëve, jam ndjekur nga ata, absolutisht kam bërë çfarë kanë thënë ata. Nuk kam eksperimentuar me medikamente që nuk duhej përdorur. Dy gjëra dua të theksoj, e para ruhuni nga ky virus nuk është aq i lehtë sa thonë, mundohuni të respektoni masat që duhen marrë”, tha Balluku.
