Mjeku Laidon Shapo, specialist i Shëndetit Publik në Londër, thotë se nisur nga numri i madh i infektimeve me coronavirus në Shqipëri gjatë dy javëve të fundit, është e qartë së në vend po qarkullon varianti i ri i Covid-19, dhe konkretisht ai britanik. Ai sugjeroi që të rritet numri i testimeve dhe testeve të shpejta për të pasur një ide të qartë të situatës, e cila sipas mjekut vjen si pasojë e qarkullimit të variantit britanik të Covid-19, që el të ketë një transmetueshmëri shumë më të lartë se virus i fillestar.
I pyetur lidhur me efikasitetin që mund të ketë në këtë situatë vendosja e orës policore duke nisur nga ora 20:00 e mbrëmjes deri në 6:00 të mëngjesit, mjeku shqiptar e cilësoi të pamjaftueshëm këtë kufizim, duke theksuar se ndalimi i qarkullimit duhet të nisë të paktën nga ora 18:00 e pasdites deri në 6 të mëngjesit. ”Ky është minimumi, duhet shumëfishim i testeve, të vazhdohet me vaksinat, aq sa janë dhe do shihnim çfarë do ndodhte”, tha mjeku.
