Lumi Vjosa dhe Shkumbini kanë dalë nga shtrati duke shkaktuar përmbytje në disa zona. Ministria e Mbrojtjes shprehet se është në gatishmëri ndërsa i bën thirrje banorëve të zonave ku ka probleme që të bëjnë kujdes. Prefekti i qarkut të Vlorës, Flamur Mamaj, tha se situata deri në këto momente është e qetë dhe sipas parashikimeve të paktën edhe për 12 orët e ardhshme nuk ka asgjë për tu shqetësuar.
”Ka patur intensitet të lartë reshjes, por situata është e qetë deri tani. Nuk ka asgjë për t’u shqetësuar për të paktën 12 orët e ardhshme. Na favorizon mungesa e reshjeve gjatë këtyre 12 orëve por edhe niveli i Vjosës në Përmet është në rënie. është në 3.5 metra në këto momente.
Vetëm në Mifol, situata prej tre orësh është në të njëjtin nivel, 6,36 cm. Edhe nga kjo prognozë jemi të bindur se s’do kemi situatë të shqetësuar. Na ndihmon diga mbrojtëse që na garanton të mos kemi situatë përmbytje.
Pika kritike që mund të kemi rrezikshmëri gjatë periudhave të mëparshme ka qenë 7.3 por me investimin që kemi tani do shohim si do sillen prurjet. Shpresojmë mos të kemi asnjë lloj shqetësimi”.
