Duke nisur nga nesër gjumashët, dhe jo vetëm, do kenë mundësi të flenë një orë më shumë. Ndryshimi do të bëhet kur të shënojë ora 03.00 mëngjesin e 28 tetorit.
Kjo do të jetë hera e fundit që ndiqet ky proces pasi 2018 shënon herën e fundit që kontinenti i Evropës ndërron orën dhe të gjitha vendet do të ketë orën e njëjtë.
Që nga viti 2002, direktiva e Bashkimit Evropian vendosi që të rregullonte ndryshimin e orës 2 herë në vit, verë e dimër. Gjithashtu u vendos që ndërrimet të bëhen në javën e fundit të marsit dhe javën e fundit të tetorit.
Gjithsesi, një raport i parlamentit Evropian në vitin 2017 arriti në përfundimin se këto ndryshime duheshin rimarrë në konsideratë. Disa vende jashtë BE-së si Rusia, Turqia, Bjellorusia dhe Islanda e kanë braktisur prej kohësh këtë praktikë.
Vendimi për mos-ndryshimin vjen për të ndihmuar në mbajtjen e një ore të njëjtë duke mos shkaktuar parregullsi në sektorin e transportit.
