Përmes një njoftimi për publikun Federata Shqiptare e Futbollit bën me dije se kanë dalë në treg biletat për ndeshjen e fundit kualifikuese të kombëtares sonë.
Më 20 nëntor Shqipëria do të pres në stadiumin Air Albania përfaqësuesen e Ishujve Faroe. Takimi është mjaft i rëndësishëm pasi do të mbyllet rrugëtimi i eleminatoreve kuqezi.
Përpara kësaj sfidë Shqipëria do të luajë në Moldavi. Ekipit të Sylvinhos në këto dy ndeshje i mjafton vetëm 1 pikë që të jetë automatikisht pjesë e europianit gjerman.
Për ndeshjen me Ishujt Faroe në Tiranë, FSHF bën të ditur se si mund të blihen biletat.
Njoftimi i FSHF-së:
Më 20 nëntor, Kombëtarja shqiptare do të luajë ndeshjen e fundit kualifikuese në grupin E kundër Ishujve Faroe, një sfidë që është planifikuar të nisë në orën 20:45 dhe do të luhet në stadiumin kombëtar ‘Air Albania’.
Federata Shqiptare e Futbollit dëshiron të njoftojë të gjithë futbolldashësit dhe tifozët e Kombëtares se nga dita e sotme do të kenë mundësi që të blejnë biletat e tyre për këtë sfidë në linkun: ebileta.al.
FSHF nënvizon se biletat do të shiten vetëm ONLINE në këtë link dhe çdo faqe tjetër është e paautorizuar për të shitur bileta.
Procedura se si blihet bileta online:
Fillimisht ju duhet të regjistroheni në platformë duke përdorur një adresë e-mail.
Më pas, zgjidhni tribunën e stadiumit dhe më pas përzgjidhni ulësen.
Pasi keni përzgjedhur ulëset, duhet të plotësoni në tabelën dialoguese të dhënat për biletat (mbiemër, emër, e-mail)
Në fund procedoni me pagesën, duke plotësuar të dhënat e kartës tuaj. Pasi të konfirmohet pagesa, bileta do të mbërrijë në adresën e-mail me të cilën jeni regjistruar në platformë.
