Pesë personat që me informacionet e tyre ndihmuan në arrestimin e atentatorit në metronë e New York, do të ndajnë mes tyre shpërblimin prej 50 mijë dollarësh të premtuar nga policia .
“Qytetarët janë personat për të cilët punojmë por ndonjëherë janë dhe aleatët tanë më të mirë”. Me këto fjalë, kreu i policisë së New York Kishant Seuell theksoi rëndësinë e detajeve të vogla që në situata të tilla si ajo e atentatit në metro, janë thelbësore.
Fal këtyre detajeve u mundësua arrestimi i Frank James, 62 vjeç, afro-amerikan i akuzuar për terrorizëm pas sulmit në metro ku mbetën të plagosur 29 persona. Brenda stacionit të metrosë, telekamerat e sigurisë nuk funksiononin atë ditë, dhe policia ofroi një shpërblim prej 50 mijë dollarësh për këdo që jepte informacione që do të çonin në arrestimin e autorit të sulmit.
U kontrolluan filmimet e dëshmitarëve dhe çdo e dhënë. Frank James u identifikua nga një kalimtar i cili ishte ulur në një restorant pranë vendngjarjes. Dhe aktualisht janë pesë persona që do të ndajnë mes tyre shpërblimin prej 50 mijë dollarësh.
