Mes shumë fëmijëve të spikatur, në edicionin e tretë të Piter Panit, është edhe Nikolla, një vogëlush i cili, kur ishte vetëm 4 vjeç, në vend që të mahnitej nga celulari apo lodrat e ndryshme, u mahnit një ditë nga dikush që pa në televizor duke recituar vargje nga “Lahuta e Malcis”.
Pas këtij momenti, ai i kërkoi të atit t’i blinte një libër: “Dhe çfarë i kërkove ti babit të të blinte?, – e pyeti Alketa Nikollën. Ai tha se i ati i bëri dhuratë librin e Gjergj Fishtës, “Lahuta e Malcis”, të cilin më pas e lexoi dhe mësoi përmendësh më shumë se 3000 vargje.
Nikolla nis të recitojë disa vargje nga Fishta dhe aty për aty, i shpall sfidë të hapur Elisa Spiropalit, e cila, provon veten përballë tij me vargjet e Nolit “Anës lumenjve”.
Nikolla është një model që na tregon të gjithëve sa shumë duhet ta duam gjuhën shqipe dhe vargjet e autorëve tanë, sa shumë frymëzim e dashuri përcjellin shkronjat dhe letrat në gjuhën mëmë. Edhe pse gjuhët e tjera, çdo ditë e më shumë fitojnë terren, fëmijë si Nikolla zgjojnë dëshirën dhe atdhedashurinë tek të gjithë ne.
