Gjermania i tha dje ‘PO’ Shqipërisë për çeljen e negociatave me Bashkimin Europian me dy kushte. Ministri i Jashtëm gjerman Heiko Maas, pasi përshëndeti vendimin e Bundestagut u shpreh se kushtet e propozuara nga Berlini mund të bindin edhe vendet e tjera në BE që janë skeptike.
“Aprovimi nga Parlamenti Gjerman për hapjen e negociatave për Shqipërinë dhe Maqedoninë e Veriut është një sinjal i rëndësishëm. Kjo tregon rëndësinë që Ballkani Perëndimor ka për BE-në. Dy vendet duhet të vazhdojnë reformat integruese. Kam besim se kushtet e propozuara nga Parlamenti Gjerman mund të bindin të tjerët në BE, për të nisur negociatat e anëtarësimit” deklaroi ai.
Tashmë pritet përgjigja e Francës dhe Holandës që janë dy nga vendet e tjera skeptike për hapjen e negociatave të Shqipërisë me Bashkimin Europian. Megjithatë Tirana zyrtare do të vijojë lobimin deri në mes të tetorit kur do të merret vendimi.
