Pesë persona janë arrestuar nga policia e Tiranës me akuzën e shpërndarjes së lëndëve narkotike.
Në pranga u vunë shtetasit Mario Kujtim Dema, banues në Rrashbull, Durrës; Ergi Saliu, banues në Shijak; Erges Nexhipi, banues në Durrës, Brajan Lala, banues në Durrës; Ledjo Gashi, banues në Shijak.
Gjithashtu u shpall në kërkim shtetasi D. B., 34 vjeç.
“Në rrugën dytësore Tiranë-Durrës, në afërsi të fshatit Marikaj, shërbimet e Policisë kanë lokalizuar shtetasit e lartpërmendur, dhe gjatë kontrollit të njërit prej automjeteve të tyre, u gjet një pako me lëndë të dyshuar narkotike të llojit kokainë, me peshë rreth 1 kg e 100 gr. Nga verifikimet e kryera ka rezultuar se këta shtetas në bashkëpunim me njëri-tjetrin, siguronin lëndë të dyshuar narkotike të llojit kokainë në Durrës, dhe më pas e shisnin atë kryesisht në lokale të natës, në Tiranë”, bëri me dije policia.
Në cilësinë e provës materiale u sekuestruan rreth 1 kg e 100 gr lëndë e dyshuar narkotike kokainë, 3 automjete, 9 aparate celulare, 710 euro si dhe 149 000 lekë.
