Në një nga marshimet më të mëdha, turma e përbërë nga qindra e mijëra përshkuan qendrën e kryeqytetit britanik, Londër, për të kërkuar nga qeveria e kryeministrit Rishi Sunak thirrjen për një armëpushim.
Marshimi i së shtunës në Londër ishte kryesisht paqësor, por policia tha nëntë persona u arrestuan: dy për sulme ndaj oficerëve dhe shtatë për shkelje të rendit publik – disa prej të cilave po trajtoheshin si krime të urrejtjes.
Policia vlerësoi se pjesëmarrja ishte midis 50,000 dhe 70,000 njerëz.
Duke i bërë jehonë qëndrimit të Uashingtonit, qeveria e Sunak nuk ka bërë thirrje për një armëpushim dhe në vend të kësaj ka mbrojtur pauzat humanitare për të lejuar që ndihma të arrijë njerëzit në Gaza.
Mbretëria e Bashkuar ka mbështetur “të drejtën” e Izraelit për të mbrojtur veten pas sulmit të 7 tetorit nga Hamasi që vrau më shumë se 1400 njerëz, kryesisht civilë.
Sipas Ministrisë palestineze të Shëndetësisë, numri i të vdekurve në Gaza ka kaluar 7,700, kryesisht civilë, që nga fillimi i bombardimeve të Izraelit tre javë më parë.
Në Malajzi, një turmë e madhe demonstruesish brohoritën parulla jashtë ambasadës së SHBA në Kuala Lumpur.
Rreth 100,000 njerëz u mblodhën në shtetin jugor indian të Kerala në solidaritet me Palestinën.
Duke iu drejtuar qindra mijëra mbështetësve në një tubim të madh në Stamboll, presidenti turk Rexhep Tajip Erdogan tha se Izraeli ishte një pushtues dhe përsëriti qëndrimin e tij që Hamasi të mos ishte një organizatë “terroriste”.
Erdogan tërhoqi një qortim të ashpër nga Izraeli këtë javë për e quajtur grupin e armatosur “luftëtarë të lirisë”.
Protesta u mbajtën edhe në kryeqytetin irakian, Bagdad.
Protestuesit palestinezë në Hebron në Bregun Perëndimor të pushtuar bënë thirrje për një bojkot global të produkteve izraelite. “Mos kontribuoni në vrasjen e fëmijëve të Palestinës,” brohoritën ata.
Diku tjetër në Evropë, njerëzit dolën në rrugët e Kopenhagës, Romës dhe Stokholmit.
Disa qytete në Francë i kanë ndaluar tubimet që nga fillimi i luftës, nga frika se mund të nxisin tensionet sociale. Por pavarësisht një ndalimi në Paris, një tubim i vogël u zhvillua të shtunën. Disa qindra njerëz marshuan gjithashtu në qytetin jugor të Marsejës.
Në kryeqytetin e Zelandës së Re, Wellington, mijëra njerëz që mbanin flamuj palestinezë dhe pankarta që lexonin “Palestina e lirë” marshuan drejt Shtëpisë së Parlamentit.
